மழைக்காலத்திலும், குளிர்காலத்திலும் சளிபிடிப்பது இயற்கையான ஒன்று. இந்த சளி தொல்லையை விரட்ட வீட்டிலேயே வளர்க்கக்கூடிய ஒரு அற்புத மூலிகை தான் கற்பூரவல்லி. இதன் மற்றொரு பெயர் ஓமவல்லி என்றும் கூறுவர். நாட்டுப்புற மருத்துவத்தில் இந்த மூலிகை பெரும் முக்கியத்துவம் வாய்ந்தது. பல நோக்கங்களுக்காக மூலிகைகளைப் பயன்படுத்தும் கலையை ஆயுர்வேதம் ஆவணப்படுத்தியுள்ளது. அதற்கு காரணம் தாவரங்களின் மருத்துவ குணங்களும், அவற்றில் உள்ள சில பைட்டோ கெமிக்கல்களும் ஆகும். அவற்றுள் கற்பூரவல்லி இலை ஏராளமான ஆரோக்கிய நன்மைகளைக் கொண்டுள்ளது. அவை இருமல் மற்றும் சளிக்கு எதிராகப் பாதுகாத்தல், சருமத்தை மேம்படுத்துதல், உடலில் உள்ள நச்சுகளை நீக்குதல், மூட்டு வலியைக் குறைத்தல், மன அழுத்தத்தைக் குறைத்தல் மற்றும் செரிமானத்தை மேம்படுத்துதல் ஆகியவை அடங்கும். எனவே கற்பூரவல்லி இலையினால் கிடைக்கும் நன்மைகளை பார்க்கலாம்.
நன்மைகள்
குழந்தைக்கு மார்பு சளி, இருமல் மற்றும் காய்ச்சல் வரும்போது கற்பூரவல்லி இலைச் சாற்றை சர்க்கரை கலந்து குழந்தைகளுக்கு கொடுக்கலாம்.
சளி, தொண்டை புண், மூக்கு அடைப்பு அல்லது சைனஸ் ஆகியவற்றால் அவதிப்பட்டால், கற்பூரவல்லி இலைகளை மென்று சாப்பிடலாம் அல்லது இலைகளில் இருந்து தேநீர் காய்ச்சி குடிக்கலாம்.
மூலிகையில் உள்ள கலவைகள் உங்கள் சுவாசக் குழாயிலிருந்து சளி மற்றும் சைனஸை அகற்றும் ஒரு சக்திவாய்ந்த சளி நீக்கியாக செயல்படும்.
இது நோய்த்தொற்றுகளுக்கு எதிராக போராடவும், நோய் எதிர்ப்பு சக்தியை அதிகரிக்கவும் உதவுகிறது.
கற்பூரவல்லி இலை காய்ச்சல், ஆஸ்துமா, ஒற்றைத் தலைவலி மற்றும் தோல் பிரச்சனைகள் போன்ற பல்வேறு நிலைகளுக்கு சிகிச்சையளிக்கப் பயன்படுத்தப்படும் ஒரு பாரம்பரிய தீர்வாகும்.
கற்பூரவல்லி இலைச்சாற்றில் இருந்து தயாரிக்கப்படும் எண்ணெய் ஆஸ்துமாவை கட்டுப்படுத்தவும், அதற்கு சிகிச்சை அளிக்கவும் உதவுகிறது.
தோல் ஒவ்வாமை மற்றும் புண்களுக்கு இது ஒரு சிறந்த மருந்து. இலைகளின் சாறு, தோலழற்சி மற்றும் அரிப்பு போன்ற தோல் தொடர்பான பிரச்சனைகளுக்கு சிகிச்சையளிக்க உதவுகிறது.
கற்பூரவல்லியில் அழற்சி எதிர்ப்பு மற்றும் கிருமி நாசினிகள் உள்ளன. இது காயங்கள் மற்றும் வெட்டுகளுக்கு சிறந்த இயற்கை மருந்தாக அமைகிறது.
இலைகளை சூடாக்கிய பின், வெட்டுகள் மற்றும் காயங்களில் வைத்து கட்டினால் விரைவாக குணமடைய உதவுகிறது. தோலில் ஏற்படும் வீக்கமும் குறையும்.
கற்பூரவல்லி இலைகளில் இருந்து தேநீர் தயாரித்து குடிக்கலாம். இது நாள்பட்ட மன அழுத்தத்தை குறைக்கிறது. இது பதட்டத்தைக் குறைத்து, மனதைத் தளர்த்தி, நிம்மதியான தூக்கத்தைத் தூண்டுகிறது.
பொடுகை உண்டாக்கும் பூஞ்சையின் வளர்ச்சியைத் தடுக்க கற்பூரவல்லி உதவுகிறது.
தேங்காய் எண்ணெயில் சில இலைகளை சேர்த்து காய்ச்சி, அதனை உச்சந்தலையில் நன்கு தடவி, லேசான ஷாம்பூவைப் பயன்படுத்தி அலசவும். இது பொடுகுத் தொல்லையிலிருந்து விடுவிக்க உதவுகிறது.
கற்பூரவல்லி இலை இதய ஆரோக்கியத்திற்கு ஏற்றது. இது இரத்த அழுத்தத்தைக் குறைக்கவும், கொலஸ்ட்ரால் அளவைக் குறைக்கவும் உதவுகிறது.
இலைகளில் இருந்து எடுக்கப்படும் சாறு சிறுநீரக கற்களை எதிர்த்துப் போராடவும் மற்றும் சிறுநீரக தொற்றுநோயைக் குறைக்கவும் உதவுகிறது. எனவே இது சிறுநீரகங்களின் சீரான செயல்பாட்டிற்கு உதவுகிறது.
இந்த மூலிகையில் ஆன்டி-ஆக்ஸிடன்ட்கள் மற்றும் ஒமேகா-6, காமா-லினோலிக் அமிலம் உள்ளது. இது மார்பக புற்றுநோய் பரவுவதை மெதுவாக்க உதவுகிறது.
இது இரத்த சர்க்கரை அளவைக் குறைக்க உதவுகிறது. இது ஆரோக்கியத்தை ஊக்குவிக்கும் அத்தியாவசிய தாதுக்கள் மற்றும் வைட்டமின்களையும் கொண்டுள்ளது.